小梅嶺物語

城北箇小梅嶺降壇的仙姑內底，有三個諸姥儂是最可憐箇，這三個儂著是西陵李八娘、梁氏小才女共槐陰仙子李氏。續落來我著先來共逐家講西陵李八娘箇故事。

西陵李八娘字蕙蘭，是唐朝箇名妓，雖然講伊是做即種免本錢箇生理，呣佫以前箇妓女共現在是無共款箇，琴棋書畫逐項攏總精通，佇唐朝迄箇時與儂叫做名妓，亦呣是講真簡單箇事誌。俗話講紅顏薄命是講甲一點亦無呣著，即箇排項攏解曉箇諸姥儂伊愛著洛陽箇讀冊儂蘇生。蘇生是一箇儒生，佇迄箇時陣，讀冊儂去風月場所亦呣是講是見不得儂箇事誌，反而儂解講儂不風流枉少年。但是無管即箇蘇生是哪一種儂，反正李八娘是一見鐘情，著共蘇生相約永遠亦（勿+會）使相棄，兩儂私訂終生，蘇生無偌久著進京考試去也。李八娘一直守著共蘇生箇約定，呣敢（勿+會）記，可是三年後箇一日，蘇生金榜題名，榮歸故里，李八娘呣知有偌歡喜，但是伊萬萬無想到箇是蘇生伊呣是一箇儂轉來箇，伊（毛+灬）了朝庭大官箇千金。李八娘呣敢相信這是正箇，伊寫了一首楊柳詞叫儂（扌+帶）與蘇生，希望伊解念起過去因兩個箇約定。真快伊著收著蘇生寫箇決絕詩，李八娘佇萬念俱灰中墜樓身亡。